მრავალფეროვანი და გამოწვევებით სავსე ცხრა წლის განმავლობაში თბილისის საერთაშორისო ლიტერატურულმა ფესტივალმა 40-ზე მეტი ქვეყნიდან 200-მდე ავტორს უმასპინძლა, მოაწყო 300-ზე მეტი ღონისძიება მწერლების, პოეტების, კრიტიკოსების, მთარგმნელების, გამომცემლებისა და ლიტერატურის სხვა პროფესიონალების მონაწილეობით; ხელი შეუწყო წიგნისა და კითხვის პოპულარიზაციას, შექმნა ციფრული არქივი და არაერთი მხატვრული ვიდეო-ინტერვიუ ავტორებთან. ფესტივალის სცენამ უმასპინძლა არაერთ მნიშვნელოვან ავტორს, მათ შორის ტომას ვენცლოვას, დი ბისი პიერის, ჩარლზ ბერნშტეინს, ბლეიკ კრაუჩს, ეთგარ კერეტს, სერჰი ჟადანს, მელანია მაცუკოს, მაიკლ პალმერს, ნინო ხარატიშვილს, ბერნჰარდ შლინკს, იური ანდრუხოვიჩს, არიანა ჰარვიცს, ლევ რუბინშტეინს, დიმიტრი ბიკოვს, ბობ ჰოლმანს, ტადეუშ დობროვსკის, დანიელ ვისერს, არნე სვინგენს და სხვებს. 

მმართველი პარტიის პოლიტიკურმა რეპრესიებმა და პირდაპირმა ჩარევამ ბოლო ორი წლის განმავლობაში მნიშვნელოვანი ცვლილებები განაპირობა ადგილობრივ კულტურულ სფეროში. შემოქმედებითი პროცესების დამოუკიდებლობის შესანარჩუნებლად, 2024 წელს თბილისის საერთაშორისო ლიტერატურული ფესტივალი პირველად გაიმართა PEN საქართველოს ეგიდით ალტერნატიულ სივრცეებში, მეგობარი ორგანიზაციებისა და კერძო სპონსორების მხარდაჭერით. PEN საქართველო არის TIFL2025-ის ორგანიზატორიც.