პოეტი, მწერალი, კრიტიკოსი და სოციოლოგი. დაიბადა 1963 წელს ქალაქ ბენევენტოში. დაამთავრა ნეაპოლის უნივერსიტეტის სოციოლოგიის ფაკულტეტი.  არის არაერთი კულტურული ღონისძიების ინიციატორი და ორგანიზატორი;  „მეტათეატრისა“ და "ვოკალ-ჯაზის"  შემსრულებელი. ხელმძღვანელობს მილანის გამომცემლობა "ვიტა ფელიჩეს" "პირველი ნაწარმოების" განყოფილებას. არის არაერთი პოეტური ანთოლოგიის შემდგენელი და მეწინასიტყვე, პოეტური პრემიების ჟიურის წევრი და თავმჯდომარე, თავადაც პრესტიჟული პრემიების მფლობელი. მათ შორისაა:  "პრემიო ლაურენტუმ", ფრანჩესკო გრაციანოს სახელობის პრემია, "სეკიას და პანაროს შორის" სახელობის ეროვნული პირველი პრემია, ქალაქ მეზანიეს ლიტერატურული პრემია, ქალაქ სასარის საერთაშორისო პრემია, "მემორიალ მელანია რეას" სახელობის ეროვნული პრემია, "ეუროპეო მასას ლიტერატურული პრემია" და სხვ.

ავტორია პოეტური კრებულებისა: "მთვარე, ვარსკვლავები... და ცის სხვა ნაწილები", "შენ, ვინც უსაზღვრო სიყვარულით მკვებავ", "არავინ იცის, რომ ყვირილი ზღვამდე აღწევს", "უცხო ალუბლის ხე", "ტიტების ხერგილებს შორის", "აპრილის ლოკოკინებისკენ", "ფრთიდან ფრთამდე", "არასრულყოფილები ახირებული  ხალხია", "მუსიკალური ბგერა მორჩილებისთვის", "ის შედედებული ყვირილი", "წასვლის წინ". პროზაული წიგნი "ნუ ივლი ფეხშიშველი" და ზღაპარი ბავშვებისთვის - "წვერებიანი მეფის ასული".  მისი ლექსები თარგმნილი და გამოქვეყნებულია ბერძნულ, რუმინულ, ფრანგულ, არაბულ, ინგლისურ და ესპანურ ენებზე.

***

ვნახე ისინი, მოდიოდნენ თავდახრილები;

მოიწევდნენ თავქვედაშვებული ჩიტებივით;

ხელებს და ფრჩხილებს წაბლისფერი სისხლი სდიოდათ

და

მუხლებს შორის ჩასდგომოდათ აკრძალული ზღვა.

ვნახე ისინი ღმერთისაგან მიტოვებულნი, დადუმებულნი.

მგლოვიარეებს და ბრაზისაგან ცრემლდამშრალებს

გაშიშვლებულ მკერდზე მიეკრათ მკვდარი შვილები

და გულამოსკვნით კვნესოდნენ „ამინ“-ს.

ვნახე ისინი  გაყუჩულები, დაბნეულები, მიუსაფრები,

თვალებში ედგათ მთელი სამყაროს ცოდვა და ბრალი,

მოდიოდნენ და ღირსება უფეთქავდათ დაჭრილ გულებში.

                   იტალიურიდან თარგმნა ნუნუ გელაძემ