პოეტი და პროზაიკოსი. დაიბადა ვენაში 1947 წელს. არის ავსტრიელი მწერლების ლიგის IG Autorinnen Autoren-ის, ავსტრიელი ავტორების ასოციაცია Grazer Autorenversammlung-ის დირექტორთა საბჭოს წევრი და მწერლების საერთაშორისო ასოციაცია Kogge-ს წევრი. ასევე არის „კითხვითი პერფორმანსების ვენის პირველი თეატრის“ თანადამაარსებელი. ეწევა სარედაქტორო საქმიანობას. არის წიგნების სერიის Lyrik aus Österreich (ავსტრიული პოეზია) და ლიტერატურული ჟურნალის „პოდიუმი“ რედაქტორი. ჩატარებული აქვს ნახატი-ლექსებისა და ფოტოების გამოფენა BildGedichte და არის 50-მდე რადიოპიესის ავტორი, რომლებიც სხვადასხვა რადიოსადგურის ეთერით გადაიცა.

მანფრედ ხობოტი მრავალი წიგნის ავტორია. გამოცემული აქვს თორმეტი პოეზიის და ოცდაექვსი პროზაული კრებული, ორი რომანი, ორი ფოტოწიგნი და ორი საბავშვო წიგნი. მისი პოეზია გამოცემულია ინგლისურ, ფრანგულ, ესპანურ, სლოვაკურ, ჩეხურ, პოლონურ, ბულგარულ, ქართულ და ბენგალურ ენებზე, პროზა კი ნათარგმნია უკრაინულად და პოლონურად.
 

შიშის ოდა

მეშინია უმდიდრეს ადამიანთა
სიას არ მოვაკლდე
სომალელებმა არ შემიპყრონ
თვითმფრინავი არ ჩამოვარდეს
როცა ჩემი აქციები ეცემა
უდაბნოში მეამბოხეების მიერ
მოტაცებული და მოხრაკული არ აღმოვჩნდე
ისეთ დღეში არ ჩავვარდე რომ ჩემს “პორშეს”
პატარა “მერსედესზე” ვცვლიდე
საცობში მოხვედრილი ავტოპარკს ვერ ვაგნებდე
ავტობანს უბენზინოდ არ ვიყო შერჩენილი
მიწისძვრის მსხვერპლი არ აღმოვჩნდე
ერთკაციან საკანში დაკითხულს
თავდებით გათავისუფლებისთვის
ასი მილიონი ევროს გადახდა არ მომესაჯოს
ციხიდან შვებულებით გამოსულს ბედმა არ მიმუხთლოს
და ღია ლიფტმა არ დამაქუცმაცოს
ბერლუსკონის გაცნობა არ მომიხდეს
ანგელა მ.-სთან და ნიკოლას ს.-სთან ერთად
მაგიდასთან ჯდომა და ხამანწკების ჭამა არ დამევალოს
გაყიდული სახლის წინ პირდაპირ ეთერში
და ლირიკულად არ გამაღმერთოს მაიკლ ჯეკსონმა
გაკოტრება არ დამემუქროს
როგორც არადედამიწელი შემთხვევით
დედამიწაზე არ დავეშვა და არაფერი
გამეგებოდეს ნავიგაციის რათა ბირჟაზე
ფასიანი ქაღალდები მიმოვფანტო
და მე, ავსტრიელი,
ამერიკული სამგზავრო პასპორტით
არ მოვევლინო ხელმეორედ ქვეყნიერებას

              გერმანულიდან თარგმნა დათო ბარბაქაძემ