ბლეიკ კრაუჩი

ბლეიკ კრაუჩი დაიბადა 1978 წელს, ამჟამად ცხოვრობს კოლორადოში. იგი ბესტსელერი რომანების ავტორი და სცენარისტია. მას ეკუთვნის რომანი „ბნელი მატერია“, რომლის მიხედვითაც თავადვე დაწერა სცენარი „სონი პიქჩერსის“ სერიალისთვის. მისი საერთაშორისოდ აღიარებული ტრილოგია „ვეივარდ ფაინსი“ სტუდია „ფოქსმა“ სერიალად გადაიღო. სერიალი N1 შოუ გახდა 2015 წლის ზაფხულში. კრაუჩი ოცდაათზე მეტ ენაზე თარგმნილი თორმეტზე მეტი რომანის ავტორია, ხოლო მისი მოთხრობები ქვეყნდება სხვადასხვა ჟურნალებში, მათ შორის Ellery Queen-ში და Alfred Hitchcock Mystery Magazine-ში. „ბნელი მატერია“ 2018 წელს გამოსცა „სულაკაურის გამომცემლობამ“. რომანი ქართულად თარგმნა ალექსი სიუკაევმა.

 

ბნელი მატერია

(ფრაგმენტი)

 

– დერეფნის კარით პარალელური სამყაროების დაუსრულებელ მწკრივს ვუკავშირდებით. ხომ მართალი ვარ?

მაგრამ იქნებ ჩვენ თვითონ განვსაზღვრავთ ამ კავშირს?

– როგორ?

– იქნებ ეს ყველაფერი გააზრებულ სიზმარს ჰგავს, რომელშიც ამ სპეციფიკურ სამყაროებს ვირჩევთ?

– შენი აზრით, იმ უამრავი სინამდვილიდან, რომლებიც „მულტისამყაროში“ არსებობს, განზრახ ავირჩიე ეს საზიზღარი სამყარო?

– განზრახ არ აგირჩევია. ალბათ, ეს იმ ემოციების ანარეკლია, რომლებსაც კარის გაღებისას განიცდიდი.

ამანდა ჭამას ამთავრებს და მშრალი ულუფის პაკეტს ცეცხლში აგდებს.

– გაიხსენე პირველი სამყარო, რომელიც ვნახეთ – გაპარტახებული ჩიკაგო... შენობები, რომლებიც თავზე გვენგრეოდა... გახსოვს, რას ვგრძნობდით იმ მომენტში, როდესაც დახურულ ავტოსადგომზე შევაბიჯეთ?

– შიშს, შფოთვას, სასოწარკვეთილებას... ოჰ, ღმერთო! ჯეისონ!

– რა?

– ბოქსიდან ანგარში გასვლამდე ჩვენი ორეულები ახსენე.

– მართლა?

– მულტისამყაროზე საუბრობდი. აღნიშნე, რომ ყველაფერი, რაც უნდა მოხდეს, აუცილებლად მოხდება და სადღაც არსებობს სამყარო, რომელშიც ჩვენმა ორეულებმა ბოქსს ვერ მიაღწიეს. რამდენიმე წამის შემდეგ კი კარი გააღე და სწორედ ეს სცენარი გათამაშდა ჩვენ წინ. ჟრუანტელს მგვრის ის აზრი, რომ ჭეშმარიტებას მივაგენით.

 

 

ინგლისურიდან თარგმნა ალექსი სიუკაევმა